Le Chant des Tournaisiens

Leray l'a dit, dins les guerr's de la France,
Quand l'caporal s'appréteot à buquer,
S'ertournant su s'n'officier d'ordonnance :
" Dis donc, l'ami, c'qu'on peut béteot qu'mincher ? "
Not' aid' de camp s'ertourneot tout d'ein' traque,
R'weitieot au leong et puis diseot comm'cha :
" Sa majesté, on peut donner l'attaque
On peut qu'mincher, les Tournaisiens sont là! " (ter)

(refrain)

La La La La La La La .....

D'aussi longtemps que l'mémoire l'permette,
Cha' té comm'cha, dins la guerr', dins la paix.
D'Jérusalem, t'iest-c' qui feonc' les ferniêtes ?
Tous les premiers, ch'est deux infants d'Tournai.
Et Godefroid, tout in suivant leu trache,
D'ein veox d'taureau crieot à ses soldats :
" On peut passer, pour tertous i'a de l'plache,
On peut rintrer, les Tournaisiens sont là ! " (ter)

(refrain)

Ein peu pus tard, quand les rois, heomm's de tiête,
F'seont'e tuer nos pèr's pour des brins d'tchiens,
Etant su l'point d'attraper ein 'doguette,
I'v'neot'nt'e querr' l'appui des Tournaisiens.
Le roi Louis conniseot bin cell' sorte,
Car i diseot, in s'mettant su s'mat'las :
" Je r'pose en paix, ne fermez pas la porte
J'peux m'endormir, les Tournaisiens sont là ! " (ter)

(refrain)

Dix-huit chint trinte éclate, et la Belgique
Tout d'ein seul bond à Bruxell's a volé.
A pied, à qu'veau, heomm's posés et pratiques,
Autour du Parc, nos gins veont s'imbusquer.
Les Brabancheons in erweitiant leux faches,
Ont demandé : " Quoiqu'ch'est qu'ces gaillards là ? "
Quand i'eont su d'quoi, i'eont dit : " Nous somm's à plache,
Nous seomm's sauvés, les Tournaisiens sont là ! " (ter)

(refrain)

Et si pus tard i'faudreot qu'on r'quéminche,
Aux greos, aux p'tits, ein Belg' sareot prouver,
Qu'i n'sufit pos de dir' : " Tais-ta, j'te minche ! "
Neon ! avant cha, i faudreot nous tuer.
Et quand not' Roi, au momint du touillache,
Dira : " M'z'infants, l'ennemi est là-bas ! "
Nous s'écrireons : " A nous, Tournai ! Courage ! "
On sintira qu'les Tournaisiens sont là ! (ter)

retour