L'lundi parjuré

Refrain:
J'vous assur' qu'in ville,
L'lundi parjuré,
Ch'est dins chaqu'famille
Ein jour bin d'siré !
 

1. A pein' que l'diape i-a mis ses bottes
   Tout l'meont' i-est él-vé dins l'maseon
   L'mopèr' beot ses trois-quat'chinottes
   Pour erguérir es'n'émotieon
   Puis v'là tout d'ein queop que l'mamère,
   D'pus longtemps in train d'busier
   S'adréchant à s'famille intière
   D'mant':" Quoi ç'qu'on f'reot bin pou souper ? "
   (refrain)
    
2. " Mi, j'aim' fell'mint l'pétit' saucisse "
   Dit ein des garcheons, " Cha ch'est m'goût ! "
   " Mi, j'vous assur' "... dit l'fill' Clarisse
   " Qu'ein morcieau d'vieau ch'est l'meilleu d'tout ! "
   Ein eaut' infant d'mante ein' cout'lette
   Mais l'pèr' leu dit : " Cré neom d'ein tchien !
   A Tournai, pou bin fair' ceull' fiête,
   L'ceu qui n'a pos d'lapin n'a rien ! "
   (refrain)
    
3. L'mamèr', tout en chifflant ein' goutte,
   Dit : " Vraimint mopère i-a raiseon ! "
   Là-d'sus, les v'là tertous in route,
   Chaquein pou s'pétit' commissieon.
   Pindant qu'les infants, au boutique,
   Veont quère ogneons, preones et raisins,
   L'pèr' et l'mèr' attrap'tent ein' bell' chique
   Tout in marchandant les lapins !
   (refrain)
    
4. Pour orvénir de l'Plach' Saint-Pierre,
   L'lapin i-est mis din ein moucheo
   A chaqu' choncliache i traîn' par tierre
   Et l'tiêt' fait soupett' dins l'rucheot !
   L'pourchéeau n's'ingraiss' pos à l'ieau claire :
   Ch'est là l'raisonn'mint d'tous ces gins !
   Au souper, tout l'meont' fait beonn' chère
   Mêm' quand cha croque ed'dins leus dints !
   (refrain)
    
5. Pindant que s'n'heomm' va boire ein verre,
   In attindant l'moumint d'minger,
   L'feimm', par ein d'ses infants, fait faire
   Les billets qu'i faudra tirer.
   Elle arrinch' tell'mint bin l'affaire
   Qu'nué feos d'sus dix ch'est l'pèr' qui-est seot !
   Ell' troèf' que ch'est l'pus bell' manière
   D'li fair' toudis rimplir el' peot!
   (refrain)
    
6. Après l'souper, ch'est dins l'usache,
   On s'réunit in société
   Nieur de Dieu, mes gins, queu plucache
   A l'bièr', au café, au péqué !
   Et puis, quervés comm' des andoules,
   In s'quittant l'lind'main au matin,
   On brondièl' dins tous les bédoules
   In cachant à r'trouver s'quémin !
   (refrain)
    
7. Si l'feimm' a eu l'bonheur d'êt' Reine,
   Ell' le fait vir d'vant de s'coucher.
   Ell' danse, ell' crie, ell' se démène,
   Ell' menace s'n'heomm' de l'buquer !
   A la fin, ç't'ichi s'fout in rache,
   Mais s'feimm' li dit : " Tais-ta, t'es l'seot ! "
   Du queop, v'là la guerre au ménache
   Et la Reine attrape ein claqueot !
   (refrain)

 retour